അതിതീവ്രപരിചരണവിഭാഗത്തിലെ ( ICICU) കണ്ണാടികൂടിലൂടെയെങ്കിലും അവളൊന്നു പുറത്തേക്കു നോക്കിയെങ്കില്‍ എന്ന് വിചാരിച്ചിക്കുംമ്പോഴെക്കും , നിശബ്ദദക്കിടയിലും അവിടെവിടെയോ അരിച്ചിറങ്ങുന്ന മുറുമുറുപ്പിനെ ഓര്‍മ്മപ്പെടുത്തി തൂവെള്ളവസ്ത്രധാരിണിയായ നഴ്സ് ചുവന്നചായം തേച്ച ചുണ്ടിലൂടെ പറഞ്ഞു നിര്‍ത്തി
” ഒന്നും പറയാറായിട്ടില്ല ….ഒരുപാട് പ്രതീക്ഷയൊന്നും വേണ്ട ..കോമയിലാണ് “
കേട്ടയുടനെ ആരോ പറഞ്ഞു
അവള്‍ക്കെന്തിന്‍റെ കേടായിരുന്നു ..
നീയിപ്പോതെന്തറിഞ്ഞിട്ടാ …അല്ലാ ഉള്ളുകളികള്‍ നമുക്കറിയില്ലല്ലോ
പുറത്തു ഒരുപാട് കഴുകന്‍ കണ്ണുകളും , കൂര്‍പ്പിച്ച ചെവിയുമായി കാത്തു നിന്നവര്‍ക്കിടയിലൂടെ ആ വാര്‍ത്ത പറന്നിറങ്ങി
അത് കേട്ട് കുറച്ചുപേര്‍ പതിയെ സംസാരിച്ചുകൊണ്ട് യാത്ര തിരിച്ചു
“കോമയോ അതിപ്പോ ചത്തതിനു സമാനമാണ് …ആസ്പത്രിക്കാര്‍ അതുമിതുമൊക്കെപ്പറയും …പത്ത് കാശുണ്ടാക്കാന്‍ കിട്ടുന്ന ചാന്‍സ്‌ അവരെന്തിന് വെറുതേ കളയണം … “
സിവില്‍പോലീസിലെ ഒരാള്‍ ബാലനെ വിളിച്ചു പറഞ്ഞു ” സ്റ്റെഷനിലോട്ടു ഒന്ന് വരണം …സംഗതി ക്രിമിനലാണ് ….ഭാര്യാപീഡനം അല്ലെങ്കില്‍ കൊലക്കുറ്റം വരെ പോകാവുന്ന കേസാണ് …ഒന്ന് കാണണം ”
തുടര്‍ന്നങ്ങോട്ടു ബാലന്‍റെ കണ്ണില്‍നിന്നിറങ്ങിയ കണ്ണുനീരിന് അര്‍ത്ഥവും നിറവും ചാര്‍ത്തികൊടുക്കാന്‍ നാട്ടുകാരില്‍ ചിലര്‍ മാത്രമേ അവശേഷിച്ചിരുന്നള്ളൂ ….
ഇപ്പോഴും വ്യക്തമായി ഓര്‍ക്കുന്നു
അപൂര്‍വ്വമായി മാത്രം വാഹനം വരാറുള്ള ഗ്രാമവീഥികളെ ഞെട്ടിച്ചുകൊണ്ട് ഫയര്‍സ്റ്റേഷന്‍ വണ്ടിയുടെ നീണ്ട അലാറംവിളിയോടെയുള്ള രംഗപ്രവേശം ഒരുതരത്തില്‍ ഉല്‍സവപ്രതീതിയായിരുന്നു സമ്മാനിച്ചത് …
കേട്ടവര്‍ കേട്ടവര്‍ , എല്ലാം മറന്നു റോഡിലേക്ക് കുതിച്ചു … ചുവന്ന വണ്ടിക്കു പുറകെ , വേറൊരു വെള്ളവണ്ടി …അടുത്തെത്തിയപ്പോള്‍ മാത്രമാണ് ആംബുലന്‍സാണെന്ന് അറിഞ്ഞത് ..അതിനു പിറകെ നിര നിരയായി ഉറുമ്പുകളെപ്പോലെ നിരവധി ഓട്ടോകളും …
ആരൊക്കെയോ വിളിച്ചുചോദിക്കുണ്ടായിരുന്നു …
ഇതെവിടെക്കാ ? എന്താ സംഭവം ..എന്തോ ആപത്ത് നടന്നിരിക്കുന്നു ….
നമ്മടവിടെ ഈ ഫയര്‍ഫോര്‍സിന്‍റെ വണ്ടി ഇതാദ്യമാ …
ഓട്ടോയില്‍ നിന്നും ഒരുപാട് പേര്‍ ഗൌരവത്തില്‍ വിളിച്ചുപറഞ്ഞു , “സംഗതി സീരിയസാണ് ..പക്ഷെ എന്താണെന്നറിയില്ല ..നോക്കാന്‍ പോക്വാ ”
അത് കേട്ട് ബാക്കിയുള്ളവരും പുറകെ യാത്രയായി … ഞാന്‍ ഒരു നിമിഷം ആലോചിച്ചു … എന്തിനാണ് ഇവര്‍ ഇത്ര ആകാംഷാകുലരാവുന്നത് …. ശരിയാണ് , ഇതിപ്പോള്‍ ആദ്യമായാണ്‌ ഇത്തരത്തില്‍ ഫയര്‍ഫോര്‍സും ആംബുലന്‍സും പോലീസുമൊക്കെ ഒരുമിച്ചു ….
നിമിഷങ്ങള്‍ക്കുള്ളില്‍ വാര്‍ത്തയെത്തി
ബാലനും ശാന്തയും കിണറ്റില്‍ ചാടിയിരിക്കുന്നു …കൂടെ രുക്കുവുമുണ്ട്
ബാലന്‍റെയും ശാന്തയുടെയും കല്യാണം കഴിഞ്ഞ്‌ ഇതിപ്പോ മാസം നാലല്ലേ ആയള്ളൂ ..അതിനിടയില്‍ ? അവന്‍റെ പിടിപ്പുകേട് അല്ലാതെന്താ — ആരോ ആദ്യവിധി പ്രസ്താവിച്ചു
ആ പെണ്ണിനെ പറഞ്ഞുപറ്റിച്ചു ഉപദ്രവിച്ചുകാണണം .. ഒടുക്കം സഹിക്കവയ്യാതെ ശാന്ത ചാടിയതായിരിക്കും – ആരോ തിരുത്തി
പക്ഷെ അപ്പൊ രുക്കുവോ ? ബുദ്ധിപൂര്‍വ്വമുള്ള ആ ചോദ്യം തുടര്‍ന്നുള്ള സംഭാഷണത്തെ നിശബ്ദയിലേക്ക് നയിച്ചു ..
ശരിയാണ് … ബാലന്‍റെ ആകെയുള്ള അമ്മയല്ലേ രുക്കു ..അവര്‍ക്കെന്തിന്‍റെ കേടാ
അവര്‍ക്കിപ്പോ അമ്പതു ആയിക്കാണുമല്ലേ …. ചിലപ്പോ രുക്കു ശാന്തയെ തള്ളിയതായിരിക്കും ..എന്തായാലും ഒന്ന് പോയി നോക്കാം …
അവശേഷിക്കുന്നവര്‍ ഊഹാപോഹങ്ങള്‍ മെനഞ്ഞെടുക്കുന്നതിനിടയില്‍ ആംബുലന്‍സ്‌ ആരെയോകൊണ്ട് തിരിച്ചു യാത്രയാരംഭിച്ചു …
ഒടുക്കം എല്ലാ ഊഹാപോഹങ്ങളെയും വകഞ്ഞുമാറ്റി ആ വാര്‍ത്ത വന്നു ..
കലപിലകള്‍ക്കിടയില്‍ , ശാന്ത യാതൊരു പ്രകോപനവും കൂടാതെ കിണറിലേക്ക് എടുത്തു ചാടിയത്രേ ..ബുദ്ധിമതിയായ രുക്കുവും തുടര്‍ന്ന് പറയാനിടയുള്ള അപവാദങ്ങളെ ഭയന്നാകണം അത് കണ്ടു പുറകെച്ചാടി … അവരെ രക്ഷപ്പെടുത്താനായി ബാലനും ….
ആ ചാട്ടം ശാന്തയെ കോമയില്‍ എത്തിച്ചിരിക്കുന്നു …. കല്യാണം കഴിഞ്ഞു മാസം ആറായില്ല .. ഒരു നിമിഷത്തിന്‍റെ ബുദ്ധിശൂന്യതെയോര്‍ത്ത് വരാനിരിക്കുന്ന ജീവിതനിമിഷം മുഴുവന്‍ ഒരു പക്ഷെ കിടക്കയില്‍ അനങ്ങാന്‍ പോലുമാകാതെ തലളക്കപ്പെട്ടെക്കാം … വിധി കരുണ കാട്ടിയെങ്കില്‍ ചിലപ്പോള്‍ പെട്ടെന്ന് ജീവിതത്തിലെക്കോ മരണത്തിലേക്കോ ചുവടു വെച്ചേക്കാം …
വികാരങ്ങളെ നിയന്ത്രിക്കാന്‍ മറന്നുതുടങ്ങിയിരിക്കുന്നോ.. ….പരസ്ത്രീ ബന്ധവും , പരപുരുഷ ബന്ധവും ആരോപിച്ചു പുറത്തു ഒരുപാട് കഥകള്‍ ഒഴുകി നടക്കുന്നു … അതിനിടയില്‍, അതിവേഗത്തിലുള്ള പ്രതികരണശേഷി പലപ്പോഴും അശാന്തിയുടെ നാള്‍വഴികള്‍ സമ്മാനിക്കുന്നല്ലോ എന്ന തിരിച്ചറിവിലേക്ക് അശാന്തമായ മനസോടെ ശാന്ത അടുക്കുകയായിരിക്കണം
ശരിയപ്പോ
സജിത്ത്
https://www.facebook.com/iamlikethisbloger
© 2012, sajithph. All rights reserved.
Copyright secured by Digiprove © 2012 Sajith ph 
