[ — ഇതു മാതൃഭൂമിയില്‍ ഒരാഴ്ച മുന്‍പ് വന്നിരുന്ന ലേഖനം ആണെന്ന് അറിഞ്ഞിരുന്നില്ല, ഒരേ വിഷയം — ]
മതവികാരം വ്രണപ്പെടുത്തുകയെന്ന യാതൊരു ഉദ്ദേശ്യവും ഈ പോസ്റ്റിനു പിന്നിലില്ല എന്നറിയിച്ചുകൊണ്ട്‌ പറഞ്ഞുതുടങ്ങട്ടെ …
വിശ്വാസം മിക്കപ്പോഴും നിയമത്തിനും മേലെയാണ് …..വിശ്വാസം മിക്കപ്പോഴും തെളിവുകള്‍ക്കും മേലെയാണ് …അതുകൊണ്ട് തന്നെ വിശ്വാസമല്ലേ എല്ലാം എന്ന് കേള്‍ക്കുമ്പോ തലകുലുക്കി സമ്മതിക്കാതെ തരമില്ല …
ഇപ്പോള്‍ ഇതു പറയാന്‍ കാരണം സനല്‍ ഇടമറുക് എന്ന യുക്തിവാദിയെ ( യുക്തിവാദി എന്ന് പറയുന്നത് തെറ്റായിരിക്കും , അതുകൊണ്ട് വിവേകശാലി എന്ന് തിരുത്താം ) ഓര്‍ത്തതുകൊണ്ടാണ്‌ …
ആരാണ് സനല്‍ ഇടമറുക് എന്നോര്‍ത്താല്‍ , തൊടുപുഴയില്‍ ജനിച്ചു വളര്‍ന്ന പത്രപ്രവര്‍ത്തനത്തില്‍ ബിരുദവും , പൊളിറ്റിക്കല്‍ സയന്‍സില്‍ ബിരുദാനന്തര ബിരുദവും ജെഎന്‍യു വില്‍നിന്നും എംഫില്‍ ബിരുദവും എടുത്ത സര്‍വ്വോപരി റാഷനലിസ്റ്റ്റ് ഇന്റര്‍നാഷണല്‍ എന്ന സങ്കടനയുടെ അറുപത്തിയേഴുകാരനായ അമരക്കാരന്‍ …
അന്ധവിശ്വാസങ്ങള്‍ക്കും അനാചാരങ്ങള്‍ക്കും എതിരെ പ്രവര്‍ത്തിച്ചിരുന്ന , ഇപ്പോള്‍ അന്താരാഷ്ട്രതലത്തില്‍ വരെ ക്രിസ്ത്യന്‍ സഭയുടെ അപ്രീതി പിടിച്ചുപറ്റി , മുംബൈ ക്രിമിനല്‍കോടതി (അധികാരത്തില്‍ രണ്ടാം സ്ഥാനം ) ജാമ്യമില്ലാ വാറന്റ് പുറപ്പെടുവിച്ചതിന്റെ ബലത്തില്‍ മുംബൈ പോലീസും ഡല്‍ഹിപോലീസും അരിച്ചുപെറുക്കുന്ന ഒരു മലയാളി … കണ്ടു കിട്ടാത്തതുകൊണ്ട് മാത്രം ജയിലില്‍ അകപ്പെടാതെ ഇരിക്കുന്ന ഒരു ഹതഭാഗ്യന്‍ …
ചെയ്ത കുറ്റം : കുറെപ്പേര്‍ക്ക് നല്ലബുദ്ധി ഉപദേശിച്ചുകൊടുത്തത്
അറിയാത്തവര്‍ക്കായി …
മുംബൈ വേളാംകണ്ണി ചര്‍ച്ചിലെ പൂര്‍ണ്ണകായ ക്രിസ്തു പ്രതിയുടെ കാല്‍ പാദത്തില്‍നിന്നും അപൂര്‍വ്വ ദിവ്യശക്തിയുള്ള പുണ്യാഹജലം പ്രവഹിക്കുന്നെന്നും , ആ പുണ്യജലം സര്‍വ്വരോഗസംഹാരിയെന്നും പ്രച്ചരിക്കപ്പെട്ടതിനെത്തുടര്‍ന്ന് അവിടേക്ക് വിശ്വാസികളുടെ ഒഴുക്കായിരുന്നു … ഒരു ടെലിവിഷന്‍ ഷോയില്‍ ഇത്തരം മൂഡമായ വിശ്വാസത്തെ അദ്ദേഹം ചോദ്യം ചെയ്തതിനെത്തുടര്‍ന്ന് സഭാമേലദ്ധ്യക്ഷന്‍മാരില്‍നിന്നും മുറുമുറുപ്പുകള്‍ തുടങ്ങി …സംഭവം നേരില്‍ കണ്ടു പൊതുജനത്തെ ബോദ്യപ്പെടുത്താന്‍ ഒരു ടെലിവിഷന്‍ ചാനലധികാരികള്‍ സൌകര്യം ചെയ്തു കൊടുത്തു …
പള്ളിയും പ്രതിമയും ചുറ്റുപാടും നിരീക്ഷിച്ച അദ്ദേഹം അത് കണ്ടെത്തി .. കുറച്ചകലെയുള്ള മൂത്രപ്പുരയില്‍ നിന്നും അഴുക്കുചാലിലൂടെ പോകേണ്ട മലിനജലം , എന്തോ തടസത്തെത്തുടര്‍ന്ന് കെട്ടിക്കിടന്നു കിനിഞ്ഞിറങ്ങി ക്രിസ്തുവിനെ തറച്ച മരക്കുരിശിന്റെ താഴത്തെ ഇളകിയിരുന്ന ആണിയിലൂടെ താഴോട്ട് തുള്ളിതുള്ളിയായി ചാടിയിരുന്നു … ആ മലിനജലമാണ് പുണ്യജലം എന്ന പേരില്‍ വിശ്വാസികള്‍ എടുത്തിരുന്നത് തെളിവിലെക്കായി കെട്ടിക്കിടക്കുന്ന വെള്ളത്തിന്റെ വീഡിയോയും കുറെയതികം ഫോട്ടോയും തെളിവിനായി എടുത്തു … .. ആ വെള്ളം മാറാരോഗങ്ങള്‍ വരുത്തും എന്നദേഹം വിളിച്ചുപറഞ്ഞു …
കുപിതരായ സഭാമേലദ്ധ്യക്ഷന്‍മാര്‍ പരാതി നല്‍കിയതിന്റെ പേരില്‍ , ഇന്ത്യന്‍ പീനല്‍ കോഡ്‌ 295A പ്രകാരം , “കരുതിക്കൂടി മതവിശ്വാസം തകര്‍ക്കാന്‍ ശ്രമിച്ചു” എന്നതിന്റെ പേരില്‍ കേസെടുത്തു ജാമ്യമില്ലാ വാറന്റ് പുറപ്പെടുവിചിരിക്കുന്നത് … മേലദ്ധ്യക്ഷന്‍മാര്‍ പറയുന്നത് , കുറച്ചു ഫോട്ടോ എടുക്കുകയല്ലാതെ വേറൊന്നും ചെയ്തില്ലെന്നും , കുരിശു നിന്ന ഭാഗം പരിശോധിച്ചത്പോലുമില്ല എന്നതാണ് …
(Article 19 of the Universal Declaration of Human Rights.) വെച്ച് ഇത്തരം അന്ധവിശ്വാസങ്ങള്‍ക്ക് എതിരെ പൊരുതുക തന്നെ ചെയ്യും എന്നാണ് അദേഹം പ്രതികരിച്ചിരിക്കുന്നത് … എന്തായാലും അദേഹത്തിന് നല്ലത് വരട്ടെ ….
ഇത്രയും പറഞ്ഞുവന്നപ്പോഴാണ് “കത്തിസ്വാമി ” എന്ന വിളിപ്പേരുള്ള നാട്ടിലെ ഒരു മുഖം ഓര്‍മ്മ വന്നത് .. ഇപ്പോള്‍ – ഫ്ലൈറ്റില്‍ പറന്നു നടന്നു പൂജയും , വിലകൂടിയ വണ്ടികളുടെ ആദ്യപൂജയുമൊക്കെ ചെയ്യുന്ന തിരക്ക്പിടിച്ച ബ്രാഹ്മണനായി ജനിച്ച ഒരു അബ്രാഹ്മണന്‍ …
ബാല്യകാലം ഓര്‍ക്കുകയാണെങ്കില്‍, . കയ്യില്‍ക്കിട്ടുന്നതെന്തും കറക്കി മുകളിലേക്കിട്ടു തികഞ്ഞ ഒരു അഭ്യാസിയെപോലെ കൈപ്പിടിയില്‍ ഒതുക്കുന്ന അവന്‍ കുട്ടികള്‍ക്ക് അത്ഭുധമായിരുന്നു … പട്ടരായി ജനിച്ചെങ്കിലും പ്രാവിന്റെ നെഞ്ചിന്‍കൂടിനോട് ചേര്‍ന്നുള്ള പൊരിച്ച മാംസവും കശുവണ്ടിപ്പഴം വാറ്റിക്കുറുക്കിയെടുത്തതും ഒന്നിച്ചടിക്കുന്ന വിദ്വാന്‍ ..
നാട്ടിലെ ചെറിയ ക്ഷേത്രത്തില്‍ സഹായിയായി നിന്നപ്പോള്‍തന്നെ അമ്പലത്തിലേക്ക് നിറയെ കാഴ്ചക്കാരെ ആകര്‍ഷിക്കാന്‍ അവനു കഴിഞ്ഞിരുന്നു … വെള്ളികെട്ടിയ കൊടുവാള്‍ കണ്ണടച്ച് മുകളിലേക്ക് എറിഞ്ഞു കൈപ്പിടിയില്‍ ഒതുക്കി തേങ്ങ പൊട്ടിച്ചിരുന്ന കാഴ്ച കാണാന്‍ ഒരുപാട് കണ്ണുകള്‍ ഉണ്ടായിരുന്നു ..അങ്ങനെ ഇരിക്കുമ്പോഴാണ് ബാല്യകാല സുഹൃത്ത്‌ ആദ്യമായ് കാര്‍ എടുത്തതിന്റെ ആഘോഷത്തിനു ബംഗ്ലൂരിലേക്ക് വിളിക്കുന്നത്‌ … വെള്ളമടി പാര്‍ട്ടിക്കിടയില്‍ തേങ്ങ പൊട്ടിക്കുന്ന കാര്യം പറഞ്ഞപ്പോള്‍ സുഹൃത്തുക്കള്‍ക്ക് അത് കാണാന്‍ ഒരേ നിര്‍ബന്ധം …പിറ്റെദിവസം വണ്ടിക്കു പൂജ ചെയ്യാമെന്നും അപ്പോള്‍ കാണിച്ചു തരാമെന്നും പറഞ്ഞു തടിയൂരി … അങ്ങനെ പൂജ നിമിഷം വന്നെത്തി … സ്ഥിരമായി ഉപയോഗിച്ചിരുന്ന വെള്ളികെട്ടിയ കൊടുവാള്‍ ഇല്ലാത്തതിനെത്തുടര്‍ന്നു , തല്ക്കാലം കിട്ടിയ കൊടുവാള്‍ കണ്ണ് കെട്ടി ആകാശത്തേക്ക് എറിഞ്ഞു , കൃത്യമായി വിരലില്‍ കൊണ്ട് അത് താഴെ പതിച്ചു .. ഉടനെതന്നെ അവിടെ കൂടി നിന്നവര്‍ ആശുപത്രിയില്‍ കൊണ്ടുപോകാനായി അടുത്തെങ്കിലും , ” അരുത് , വേണ്ട ” എന്ന് പറഞ്ഞുതുടങ്ങുന്നതിനിടയില്‍ ബോധം കെട്ടു …
സുഹൃത്ത്‌ ഓടിച്ചെന്നു അയാളെ തൂക്കിയെടുത്തു കാര്‍ അതിവേഗം ഓടിച്ചുപോയി , രക്തം കണ്ടു പേടിച്ചോ , അല്ലെങ്കില്‍ ആദ്യമായ് പരിചിതമല്ലാത്ത വണ്ടി ഓടിച്ചിരുന്നതുകൊണ്ടോ അങ്ങനെയെന്തുകൊണ്ടോ , ആ യാത്ര വേറൊരു അപകടത്തില്‍ കലാശിച്ചു … ആ അപകടവിവരം കേട്ടവര്‍ പറഞ്ഞു , പൂജാരി പറഞ്ഞതാണ്‌ ” അരുത് വേണ്ട ” എന്നൊക്കെ .. ശകുനം ശരിയില്ലായിരുന്നല്ലോ … കേള്‍ക്കാതെ അതെ വണ്ടി ഓടിച്ചു പോയി … എന്നിട്ടെന്തായി .. വാര്‍ത്ത സുഹൃത്തുക്കള്‍ക്ക് ഇടയില്‍ പരന്നു … അവിടുത്തെ നാട്ടുകാര്‍ക്കിടയില്‍ പൂജാരിക്ക് ദിവ്യ പരിവേഷം കൈവന്നു … . പ്രാവും വാറ്റും അടിച്ചു നടക്കുന്നതുകൊണ്ട് നാട്ടില്‍ അയാള്‍ക്ക് തീരെ വിലയില്ലെങ്കിലും എവിടെ നിന്നൊക്കെയോ അയാളെ തേടി ഒരുപാടു പേര്‍ വരാറുണ്ട് …അയാള്‍ക്ക് ഒരു ദിവ്യത്വുമില്ലെന്നു നാട്ടില്‍ എല്ലാര്‍ക്കും അറിയാം .. എന്നിട്ടും ..!!
. പൂജക്ക്‌ പോകുമ്പോള്‍ പരിഹാരക്രിയകള്‍ കൂടെ നിര്‍ദ്ദേശിക്കുമത്രേ , എന്തെങ്കിലും അരുതാത്തത് വന്നാലോ എന്ന് പേടിച്ചു പറഞ്ഞ പരിഹാരക്രിയ ചെയ്യും … പുതിയ ഒരു വണ്ടി എടുക്കുംപോഴോ , വേറെ എന്തെങ്കിലും പൂജക്കോ ഒരു വിശ്വാസമായി അയാള്‍ തുടര്‍ന്ന് പോരുന്നു …ഒരു ബ്രാഹ്മണന്‍ പൂജ ചെയ്ത കത്തി കണ്ണുകെട്ടി മുകളിലേക്കിട്ടു കൈപ്പിടിയില്‍ ഒതുക്കുമ്പോള്‍ , പരിഹാരം പറയുമ്പോള്‍ , കുറെ വിശ്വാസികള്‍ക്ക് (അന്ധ) അതൊരു വിശ്വാസം ….
.
ത്രിപ്പൂത്താറാട്ടിന്റെ തീരങ്ങളിലൂടെ എന്ന പോസ്റ്റില്‍ സൂചിപ്പിച്ചപോലെ – മുലപ്പാല്‍ പോലും കാശിനു കുപ്പിയില്‍ക്കിട്ടുന്ന ഈ ആഗോളവല്‍ക്കരണകാലത്ത് ഭക്തിയും കച്ചവടമാണല്ലോ … ലോകം മുഴുവന്‍ ഒരു ഓപ്പണ്‍ മാര്‍ക്കറ്റ് , നമ്മളൊക്കെ സ്വയം വിലപേശപ്പെടുന്ന പ്രൊഡക്റ്റും … നന്നായി മാര്‍ക്കറ്റ് ചെയ്യാനറിയുന്നവന്‍ കാശുണ്ടാക്കുന്നു …. വിശ്വാസിയെ തിരുത്താം , പക്ഷെ അന്ധവിശ്വാസികളെ . ? . അന്ധവിശ്വാസികള്‍ വിശ്വസിക്കട്ടെ ..
സജിത്ത് , https://www.facebook.com/iamlikethisbloger
© 2012, sajithph. All rights reserved.
Copyright secured by Digiprove © 2012 Sajith ph 
ഞാൻ വായിച്ചിട്ടില്ല,
കാരണം, ഇറ്റാലിക്സിൽ എഴുതിയത് ഞാൻ വായിക്കില്ല.
ഇറ്റാലിക്സ് മാറ്റിയിരിക്കുന്നു !!!!!!!!!